Հայկական հարցերի ուսումնասիրութեան կենտրոն «ՀՈՒՍԿ»-ի նախաձեռնութեամբ, երէկ երեկոյեան, նոյն կենտրոնում հերթական ամսական դասախօսութիւնների շարանում կազմակերպւել էր դասախօսական երեկոյ:
Դասախօսութեան թեման էր «Ղարաբաղի հակամարտութիւնը եւ Իրանի ու Թուրքիայի դերը». օրւայ դասախօսն էր փորձագէտ Սալար Սէյֆօլդինին:
Սկզբում Կազմակերպիչ յանձնախմբի կողմից օրւայ դասախօսի մասին հակիրճ բացատրութիւններ փոխանցեց Իսիկ Իւնանէսեանը:
Ապա ելոյթ ունեցաւ օրւայ դասախօսը: Նա համապարփակ բացատրութիւն փոխանցեց Ղարաբաղեան հակամարտութեան էութեան եւ միջազգային անդրադարձի ու տարբեր երկրների, այդ թւում Արեւմուտքի ու Ռուսաստանի ու Թուրքիայի միջամտութիւնների եւ Իրանի կեցւածքի մասին:
Դասախօսն ասաց, որ յիշեալ հակամարտութեան հարցով ադրբեջանական կողմը փորձում է հոգեբանական ճնշումներ իրականացնել եւ խաղալ իր ժողովրդի ազգային զգացումների հետ ու փորձում է իր ներքին կառոյցներում առգոյ դժւարութիւնները լուծել արտաքին թշնամու գաղափարը տարածելով: Նա աւելացրեց, որ երբ Բաքւում սկսւում են արծարծւել ներքին բարեփոխութիւնների մասին հարցեր, աւելի է ծայր առնում այսպէս ասած արտաքին թշնամու գաղափարը: Դասախօսը նաեւ կարեւորութեամբ անդրադարձաւ Ղարաբաղեան հակամարտութեան կարգաւորման հարցով Իրանի չափաւոր քաղաքականութեանը:
Դասախօսութեան աւարտին ներկաների կողմից հնչեցին հարցեր՝ կապւած Թուրքիայի դերակատարութեանը, եւ այլ միջամտութիւններին, որոնց սպառիչ պատասխաններ էր տալիս դասախօսը:
ԱԼԻՔ