Հաղորդագրութիւն
Լիբանանի Հայ դատի մարմինը ներկայացնող պատուիրակութիւն մը երէկ առաւօտուն այցելեց Լիբանանի մէջ Զուիցերիոյ դեսպանատուն եւ հանդիպում ունեցաւ Զուիցերիոյ դեսպան Ռութ Ֆլինթի հետ: Հանդիպման նպատակն էր դեսպանին հետ արծարծել Մարդկային իրաւանց եւրոպական դատարանի` Հայոց ցեղասպանութիւնը ուրացող թուրք քաղաքական գործիչ Տողու Փերինչեքի ի նպաստ որոշումը: Փերինչեք Զուիցերիոյ մէջ Հայոց ցեղասպանութիւնը անուանած էր «միջազգային սուտ», որուն իբրեւ հետեւանք դատապարտուած եւ տուգանուած էր զուիցերիական դատարաններու կողմէ, Զուիցերիոյ ժխտողականութեան դէմ օրէնքը ոտնահարած ըլլալուն համար: Մարդկային իրաւանց եւրոպական դատարանը 17 դեկտեմբեր 2013-ին, քննելով Փերինչեքի դիմումը, գտած էր, որ Փերինչեքի դէմ զուիցերիական դատարաններու որոշումները ոտնահարած են անոր խօսքի ազատութիւնը:
Լիբանանի Հայ դատի մարմինի պատուիրակութիւնը դեսպան Ֆլինթի փոխանցեց մարմինի զօրակցութիւնը եւ քաջալերանքը` զուիցերիական իշխանութիւններուն կողմէ եւրոպական դատարանի որոշման բողոքարկման գծով:
Դեսպան Ֆլինթ իր կարգին հաստատեց, որ ինք լաւատեղեակ է հարցին էութենէն եւ կը գնահատէ Հայ դատի մարմինի զօրակցական այցելութիւնը: Ան նշեց, որ Զուիցերիոյ իշխանութիւնները կը բաժնեն հայ ժողովուրդի արդար ընդվզումը եւ լրջօրէն կը սերտեն եւրոպական դատարանի որոշման հանգամանքները: Ան ընդգծեց, որ Փերինչեք դատապարտուած է համաձայն օրէնքի մը, որ որդեգրուած է արգիլելու համար բոլոր ցեղասպանութիւններուն ժխտումը, եւ Փերինչեքի գծով զուիցերիական դատարաններուն որոշումները եղած են արդար:
Հայ դատի մարմինի պատուիրակութիւնը դեսպանին ուշադրութեան յանձնեց այն իրողութիւնը, որ եւրոպական դատարանի որոշումը անփոփոխ պահելը կը յանգեցնէ Եւրոպայի մէջ ժխտողականութիւնը հանդուրժող մթնոլորտի մը հաստատման, ինչ որ պիտի նպաստէ Հայոց ցեղասպանութեան 100-ամեակի նախօրեակին թուրք ծայրայեղականներու կողմէ հակահայ քարոզչութեան եւ ժխտողականութեան սաստկացման:
Դեսպանը խոստացաւ հանդիպումին բովանդակութիւնը եւ պատուիրակութեան կողմէ ներկայացուած եւրոպական դատարանի որոշման բողոքարկման պահանջը շուտով փոխանցել Զուիցերիոյ արտաքին գործոց նախարարութեան:
ԼԻԲԱՆԱՆԻ ՀԱՅ ԴԱՏԻ ՄԱՐՄԻՆ
بيان لجنة القضية الأرمنية في لبنان
قام وفد من لجنة القضية الأرمنية في لبنان بزيارة الى سفارة سويسرا في لبنان، والتقى مع السفير السويسري روت فلينت، حيث جرى الحديث حول قرار المحكمة الأوروبية لحقوق الانسان في قضية دوغو بيرنجيك، السياسي التركي الذي أنكر الإبادة الأرمنية.
يذكر أن بيرنجيك وصف الإبادة الأرمنية بأنها “كذبة دولية”، وجرت مقاضاته وتغريمه من قبل محاكم سويسرية بسبب انتهاكه لقانون الانكار في سويسرا.
إلا أن المحكمة الأوروبية لحقوق الانسان وجدت في 17 كانون الأول 2013 أن قرارات المحاكم السويسرية بقضية بيرنجيك انتهكت حرية التعبير.
وبذلك نقلت لجنة القضية الأرمنية في لبنان للسفير السويسري دعمها وتشجيعها للاحتجاج على المحكمة الأوروبية من قبل السلطات السويسرية.
وبدوره أكد السفير فلينت على أن السلطات السويسرية تشارك الشعب الأرمني احتجاجه العادل، وتبحث في حيثيات القرار، مثمناً زيارة اللجنة الى السفارة.
كما لفتت اللجنة انتباه السفير الى حقيقة أن عدم تعديل قرار المحكمة السويسرية سيعزز جو من الإنكار في أوروبا، ما سيسهم في تعزيز الانكار والحملة المعادية ضد الأرمن من قبل المتطرفين الأتراك عشية مئوية الإبادة الأرمنية.
وأكد السفير على أنه سيرسل مضمون الزيارة والاحتجاج على قرار المحكمة الأوروبية الى وزارة الخارجية السويسرية.