(ԱԼԻՔ) Նախաձեռնութեամբ Հայ Դատի «Արձագանգ» քարոզչական յանձնախմբի, Հայ Յեղափոխական Դաշնակցութեան հիմնադրման 126-ամեակի առթիւ, ուրբաթ՝ հոկտեմբերի 21-ի երեկոյեան, Նոր Ջուղայի Հայ Մ. Մ. «Արարատ» միութեան սրահում տեղի ունեցաւ հանդիսաւոր տօնախմբութիւն, որն սկիզբ առաւ «Մշակ բանւոր»-ի յոտնկայս ունկնդրութեամբ եւ երեկոյի հանդիսավար Մանիա Ղուկասեանի բացման խօսքով:
Ծրագրում բանախօսութեամբ հանդէս եկաւ ազգային-հասարակական գործիչ Նոէլ Մինասեանը, ով հիմնականում իր ելոյթը ծաւալեց երկու ուղղութիւններով. սկզբում նշեց 126-ամեայ կուսակցութեան գործունէութիւնը՝ յանուն՝ հայ ժողովրդի եւ հայրենիքի պաշտպանութեան, Հայ Դատի միջազգային ճանաչման ու դատապարտման, ինչու չէ նաեւ հայոց պետականութեան կերտման, ապա անդրադարձաւ Դաշնակցութեան մերօրեայ առաքելութեանը՝ հայ ժողովրդի առջեւ ծառացած մարտահրաւէրների դիմագրաւման ծիրում:
Ծրագրի գեղարւեստական բաժնում ազգային-յեղափոխական երգերով ելոյթ ունեցաւ Եւրեւանի Կոմիտասի անւան պետական երաժշտանոցի հայկական երգեցողութեան բաժնի դասախօս, երգիչ Սամուէլ Գալստեանը:
Մանրամասնութիւները՝ հետագայում:
Թղթակից (Նոր Ջուղա)
Լուսանկարիչ՝ ԳԵՒԻԿ ԽԱՉԱՏՐԵԱՆ
Հ. Յ. Դաշնակցութեան հիմնադրման 126-ամեակի տօնակատարութիւնը՝ Նոր Ջուղայում
(ԱԼԻՔ, 31 Հոկտեմբերի 2016) Նախաձեռնութեամբ Հայ Դատի «Արձագանգ» քարոզչական յանձնախմբի, ուրբաթ՝ հոկտեմբերի 21-ի երեկոյեան, Նոր Ջուղայի Հայ Մ. Մ. «Արարատ» միութեան սրահում տեղի ունեցաւ հանդիսաւոր տօնախմբութիւն՝ յանուն հայ ժողովրդի ու հայրենիքի ծնունդ առած կուսակցութեան՝ Հայ Յեղափոխական Դաշնակցութեան 126-ամեայ յոբելեանի առթիւ:
Միջոցառմանը ներկայ էին՝ Սպահանի հայոց թեմի կաթողիկոսական փոխանորդ Տ. Սիփան ծ. վրդ. Քէչէճեանը, Շահինշահրի հայ համայնքի հոգեւոր տեսուչ Տ. Անանիա ծ. վրդ. Գուճանեանը, քահանայից դասը, Իրանի Իսլ. խորհրդարանում Սպահանի եւ հարաւային իրանահայութեան պատգամաւոր Ժորժիկ Աբրահամեանը, շրջանի Հայ Դատի յանձնախմբի անդամները, ազգային մարմինների, հայոց դպրոցների ու միութիւնների ներկայացուցիչներ, գաղափարակից կուսակցականներ եւ ժողովուրդ:
Երեկոն սկիզբ առաւ ՀՅԴ քայլերգ «Մշակ բանւոր»-ի յոտնկայս ունկնդրութեամբ: Այնուհետեւ հանդիսավար Մանիա Ղուկասեանն իր բացման խօսքում անդրադառնալով Դաշնակցութեան ծնունդին եւ 126-ամեայ անխափան ուղու կարեւորագոյն գործունէութեանը նշեց. «Հայապահպանութիւնն ու Սփիւռքի կազմակերպումը երբեւէ ինքնանպատակ չդարձաւ, քանի որ Դաշնակցութիւնը նոյնիսկ 70 տարիներ հայրենիքից տարագրւած լինելով, երբեւէ չդադարեց հայրենակենտրոն լինելուց: Իր հիմնադրութիւնից ուղիղ մէկ դար յետոյ Դաշնակցութիւնը կրկին հայրենիքում էր, մեր նոր պատմութեան կիզակէտում՝ Հայաստանի Հանրապետութեան վերանկախացման ու նոր պետականութեան կերտման, Արցախեան ազատագրական պայքարի ու միջազգային կարգավիճակի հաստատման, Ջաւախքին նեցուկ հանդիսանալու, Հայոց Ցեղասպանութեան ճանաչման եւ հատուցման գործը պետական մակարդակով հետապնդելու ճակատներում, որոնք բնութագրում են Դաշնակցութեան վերջին քառորդ դարեայ պատմութիւնը»:
Բացման խօսքին յաջորդեց երեկոյի բանախօսական բաժինը, որտեղ ելոյթ ունեցաւ ազգային-հասարակական գործիչ Նոէլ Մինասեանը: Բանախօսն իր արտայայտութիւնների սկզբնական բաժնում նշելով, որ կուսակցութեան հիմնադրման ամեակների նշումը, դաշնակցութեան աշխարհասփիւռ կառոյցների համար ձեւաւորւել է՝ որպէս ժողովրդին հաշւետւութիւն ներկայացնելու օր եւ կուսակցութեան քաղաքական ու հասարակական գործունէութիւնը, ինչու չէ նաեւ ձեռքբերումներն ու բացթողումները գնահատելու լաւագոյն առիթ, աւելացրեց. «1924 թւականին, քաղաքական նոր պայմանների, Դաշնակցութեան տարագրութեան եւ յեղափոխական գործիչների կենսամակարդակից առաջացած մի շարք մտահոգութիւնների պատճառով, Փարիզում գումարւած ՀՅԴ 10-րդ Ընդհանուր ժողովում որոշւեց իւրաքանչիւր տարի՝ նախընտրաբար հոկտեմբեր ամսին, նշել Դաշնակցութեան օրը եւ սոյն յոբելեանական միջոցառումների նւիրահաւաքներից գոյացած գումարներն ամբողջութեամբ յատկացնել վետերանների հիմնադրամին: 1972-ին՝ ՀՅԴ 20-րդ Ընդհանուր ժողովը նկատի առնելով կատարւած սերնդափոխութիւնը եւ այն հանգամանքը, որ այլեւս վետերաններին նիւթապէս օժանդակելու անհրաժեշտութիւն չկար, աւարտւած համարեց իր այդ առաքելութիւնը, սակայն պահպանեց կուսակցութեան հիմնադրման օրը նշելու աւանդութիւնը»:
Նոէլ Մինասեանն իր խօսքի շարունակութեան մէջ թւարկելով 126-ամեայ կուսակցութեան գործունէութեան կարեւորագոյն աշխատանքներից՝ ինքնապաշտպանական կռիւների եւ կամաւորական շարժումների կազմակերպումը, Արցախի ազատագրական պայքարը, Սփիւռքի կազմակերպումը եւ Հայոց Ցեղասպանութեան միջազգայնօրէն ճանաչման ու դատապարտման, ինչու չէ նաեւ Հայաստանի վերանկախացման ուղղութեամբ իրականացւած աշխատանքերը, անդրադարձ ունեցաւ Դաշնակցութեան մերօրեայ առաքելութեանը՝ այն ամփոփելով հետեւեալ կէտերի ներքոյ. ա- Հայաստանի Հանրապետութեան պետականութեան հզօրացում, տնտեսութեան զարգացում եւ ժողովրդավարութեան հիմքերի ամրապնդում. բ- Արցախի հարցի շուրջ բանակցութիւնների հանգուցալուծում. գ- Սփիւռքահայութեան խնդիրների լուծում եւ յատկապէս Միջին Արեւելքի ռազմական գործողութիւնների կիզակէտում յայտնւած սիրիահայութեան ինքնապաշտպանութեան կազմակերպում ու անվտանգութեան ապահովում. դ- Հայոց Ցեղասպանութեան միջազգայնօրէն ճանաչման եւ դատապարտման ուղղութեամբ աշխատանքների իրագործում:
Բանախօսն իր խօսքը եզրափակեց ընդգծելով հետեւեալ տողերը. «Դաշնակցութիւնը գործեց յանուն հայ ժողովրդի՝ հաւատալով նրա ուժին եւ կարողութեանը, իսկ այսօր դարձեալ կուսակցութիւնը ապաւինում է իր ժողովրդին՝ բոլոր մարտահրաւէրները դիմագրաւելու համար՝ յոյսի եւ յաղթանակի ակնկալիքով»:
Ծրագրի երկրորդ բաժնում հանդիսատեսը ոգեշնչւեց ազգային-յեղափոխական երգերով՝ Երեւանի Կոմիտասի անւան Պետական կոնսերւատորիայի հայկական երգեցողութեան բաժնի դասախօս, երգիչ Սամուէլ Գալստեանի կատարմամբ. սոյն բաժինը համեմւեց հանդիսավարի միջոցով՝ ՀՅԴ հիմնադիրների ու գործիչների խօսքերի մէջբերմամբ:
Թղթակից (Նոր Ջուղա)
Լուսանկարիչ՝
ԳԵՒԻԿ ԽԱՉԱՏՐԵԱՆ