«ԱԼԻՔ» – Ամենամեայ կարգով Թեհրանի Հայ Դատի յանձնախմբի կազմակերպութեամբ՝ դեկտեմբերի 5-ին եւ 6-ին «Ալիք» հաստատութեան «Հրայր Մարուխեան» սրահում տեղի ունեցաւ «Հայ Դատն այսօր» 10-րդ յոբելեանական խորհրդաժողովը:
Խորհրդաժողովը սկսւեց տասնամեակի մասին պատմող կարճամետրաժ տեսաֆիլմով:
Մասնակից զեկուցաբերները, որոնք ժամանել էին՝ Եւրոպայից, Հայաստանից եւ հայրենի Ջաւախքից ու Արցախից իրենց իրանահայ գործընկերների հետ համաժողովի առաջին օրը անդրադարձան մեր օրերում Հայ Դատի եւ պահանջատիրութեան հասկացութիւններին:
Թեհրանի եւ Սպահանի հայոց թեմերի հոգեւոր առաջնորդներ՝ Տ. Սեպուհ արք. Սարգսեանը եւ Տ. Բաբգէն եպս. Չարեանը ողջոյնի եւ օրհնանքի խօսքերի ընդմիջից վստահեցրին, որ այսօր էլ Հայ Եկեղեցին կանգնած է Հայ Դատի եւ հայոց պահանջատիրութեան կողքին:
Ապա Թեհրանի հայոց թեմի առաջնորդ Տ. Սեպուհ արք. Սարգսեանը ներկայացրեց «Հայ Դատը, պահանջատիրութիւնը եւ Հայոց Եկեղեցին» թեմայով իր զեկոյցը:
Հայ Դատի խնդիրների եւ պահանջատիրութեան հետ կապւած ՀՀ պաշտօնական տեսակէտը փոխանցեց ԻԻՀ-ում ՀՀ արտակարգ եւ լիազօր դեսպան Գրիգոր Առաքելեանը:
Անդրադարձ եղաւ Հայ Դատը եւ պահանջատիրութիւնը՝ մշակոյթի եւ արւեստի լեզւով համաշխարհային հանրութեանը ներկայացնելու եւ մեր ժողովրդի պատմութիւնը առաւել ճանաչելի դարձնելու խնդիրներին, ընդգծւեց յատկապէս առաւել ժամանակակից եւ մատչելի ձեւով, յատկապէս՝ շարժանկարով մատուցելու արդիւնաւէտութիւնը:
Ապա համաժողովին ՀՅԴ Բիւրոյի քաղաքական հարցերի եւ Հայ Դատի Կենտրոնական գրասենեակի պատասխանատու Կիրօ Մանոյեանը ներկայացրեց Կենտրոնական գրասենեակի աշխատանքային զեկոյցը, Եւրոպայի Հայ Դատի գրասենեակի նախագահ Գասպար Կարապետեանը՝ Եւրոպայի գրասենեակի զեկոյցը, եւ Թեհրանի Հայ Դատի յանձնախմբի փոխնախագահ Արամ Շահնազարեանը՝ Թեհրանի Հայ Դատի աշխատանքային զեկոյցը:
Խորհրդաժողովը իր աշխատանքները քննարկման առնելով Հայ Դատի շրջանակներում՝ արծարծեց Լեռնային Ղարաբաղի Հանրապետութեան, Ջաւախքի, Թուրքիայի, Մերձաւոր Արեւելքի, Եւրոպայի ու յատկապէս Իրանի հետ կապւած խնդիրներ, անդրադարձ եղաւ Մաքսային միութեանը ՀՀ-ի անդամակցութեան, ինչպէս նաեւ Եւրոմիութեան հետ կապւած տարածաշրջանային հնարաւոր վերադասաւորումներին:
Աշխատանքների վերջին մասում քննութեան առնւեց ԶԼՄ-ների դերակատարութեանը Հայ Դատի քարոզչութեան (Հայաստան) եւ հակաքարոզչութեան (Ադրբեջան, Թուրքիա) հնարաւոր ազդեցութիւններին:
Խորհրդաժողովը իր աշխատանքները եզրափակեց քննարկելով երիտասարդութեան դերը՝ 100-ամեակի սեմին թեման:
Հայ Դատի յանձնախմբի ամփոփիչ խօսքով ելոյթ ունեցաւ փոխնախագահ Արամ Շահնազարեանը, որի խօսքի աւարտին յանձնախմբի նախագահ Յովսէփ Աւետեանը յուշանւէր յանձնեց ՀՅԴ Բիւրոյի քաղաքական հարցերի եւ Հայ Դատի Կենտրոնական գրասենեակի պատասխանատու Կիրօ Մանոյեանին՝ այս տասնամեակում խորհրդաժողովին նրա անմնացորդ աջակցութեան եւ մասնակցութեան համար:
Այսպիսով աւարտւեց երկօրեայ նիստերի լիագումար աշխատանքները եւ վստահ ենք, որ այս յոբելեանական 10-ամեակը լաւագոյն սկզիբն է նորանոր նւաճումների, որոնք կարող են իրավիճակ փոխող ազդեցիկ դերակատարութիւն ունենալ Հայ Դատի եւ պահանջատիրութեան մեր ազգային հիմնահարցում:
Առաւել մանրամասն խորհրդաժողովին կանդրադառնանք մեր առաջիկայ համարներում: