Երէկ՝ ապրիլի 14-ին, «ՀՈՒՍԿ» հաստատութեան նախաձեռնութեամբ, հաստատութեան կենտրոնատեղիում, տեղի ունեցաւ հերթական դասախօսական երեկոն:
Դասախօսութեան թեման էր «Հայոց Ցեղասպանութիւնը եւ Քեսաբի իրադարձութիւնները», իսկ օրւայ դասախօսն էր քաղաքական-հասարակական գործիչ Սուրիկ Աբնուսեանը:
Խօսելով Հայոց Ցեղասպանութեան մասին՝ դասախօսը ներկաների ուշադրութիւնը հրաւիրեց այն փաստի վրայ, թէ ինչպէս լեհ իրաւաբան Ռաֆայէլ Լեմկինը հիմք ընդունելով Հայոց Ցեղասպանութիւնը, ինչպէս նաեւ հրեաների Հոլոկոստը, կազմեց Ցեղասպանութեան կոնւենցիան:
Ներկայացնելով ցեղասպանութիւն հասկացողութեան սահմանումը, պրն. Աբնուսեանը համեմատական կարգով փաստեց, որ Հայոց Ցեղասպանութիւնն ամբողջովին համապատասխանում է Լեմկինի կազմած կոնւենցիայում ցեղասպանութեան համար սահմանւած բանաձեւին:
Դասախօսութեան երկրորդ բաժնում դասախօսն անդրադարձաւ այս օրերին ողջ հայութեանը յուզող հայկական Քեսաբում ծաւալւող իրադարձութիւններին: Նա նախ ներկաներին հակիրճ տեղեկութիւններ փոխանցեց Քեսաբի աշխարհագրական դիրքի, պատմութեան, դեմոգրաֆիկ պատկերի եւ ազգային կառոյցների վերաբերեալ, ապա խօսեց Քեսաբի կարեւորութեան, ինչպէս նաեւ այնտեղ ծաւալւող իրադարձութիւնների մասին:
Իր վերլուծական ելոյթում պրն. Աբնուսեանը ներկաներին բացատրեց, թէ Թուրքիայի իշխանութիւններն ինչու հէնց այս պահին են որոշել իրականացնել Քեսաբի հայաթափումն ու ինչ նպատակներ են փորձում իրագործել:
ԱԼԻՔ