(ԱՍՊԱՐԷԶ) Ամերիկայի Հայ Դատի Յանձնախմբի Արհեստավարժների Ցանցը Յուլիսի 31ին կրկին առիթ էր ստեղծել իր անդամների եւ ամերիկահայ երիտասարդների համար համախմբուելու ամառային գեղեցիկ ձեռնարկի շրջանակներում, որի հիւրն էր Գլենդելի քաղաքապետարանի քարտուղար եւ Կալիֆորնիայի խորհրդարանի անդամութեան թեկնածու Արտաշէս Քասախեանը: Երիտասարդ քաղաքական-հասարակական գործիչը պատմեց իր անցած ուղու մասին, ներկայացրեց տարբեր գործընթացներում մասնակից լինելու կարեւորութիւնը, նաեւ անբռնազբօսիկ մթնոլորտում շփուեց ներկաների հետ՝ խորհուրդներ տալով եւ պատասխանելով իրեն դիմող երիտասարդներին:
Արհեստավարժների միութեան տարաբնոյթ ձեռնարկները իւրատեսակ հարթակ են ստեղծում տարբեր ոլորտներում կայացած մասնագէտների համար՝ ծանօթանալու միմեանց հետ, փոխանակուելու աշխատանքային հմ-տութիւններով եւ համագործակցութեան համատեղ ծրագրեր մշակելու, միաժամանակ՝ առիթ են ուսանողների, պատանիների ու երիտասարդների համար նոր կապեր ստեղծելու, արհեստավարժներից խորհրդատուութիւն ստանալու: «Հայ Դատի յանձնախմբի Արհեստավարժների ցանցը համախմբում է ամերիկահայ բազմաթիւ կայացած անհատների, ում միաւորում է նոյն մշակոյթը, սոցիալական պատասխանատուութիւնները, գաղափարները: Մեր կազմակերպութեան նպատակներից է աջակցել ամերիկահայ երիտասարդներին՝ ձեռք բերելու ղեկավարի հմտութիւններ եւ ցոյց տալու ուղիներ՝ իրենց մասնագիտական ոլորտներում յաջողելու համար: Դրան մենք փորձում ենք հասնել նոր սերունդներին սոցիալական, կրթական եւ համայնքային ծրագրերում ներգրաւուելով», նշում է ցանցի համանախագահ Շանթ Սահակեանը:
Արհեստավարժների ցանցը պարբերաբար անցկացնում է տարբեր բնոյթի հաւաքներ՝ այդ թւում խորհրդատուական ձեռնարկներ, մասնագիտական դասախօսութիւններ, ժամանցային բնոյթի միջոցառումներ: Միաժամանակ, Արհեստավարժների մի-ութեան անդամները նիւթապէս եւ բարոյական աջակցում են Միացեալ Նահանգներում գործող հայկական կազմակերպութիւններին, համագործակցում նրանց հետ: Շանթ Սահակեանը տեղեկացրեց, որ Սեպտեմբերին, Ամերիկայի Հայ իրաւաբանների միութեան հետ նախատեսում են անցկացնել անվճար իրաւաբանական խորհրդատուութիւն, որտեղ տարբեր ոլորտների փաստաբաններ կը պատասխանեն մեր համայնքի ներկայացուցիչների հարցերին եւ իրաւական լուծումներ կ՛առաջարկեն:
Արհեստավարժների ցանցի աշխատանքների եւ առաջիկայ ձեռնարկների մասին տեղեկանալու համար գործում է հետեւեալ կայքը՝ www.ancapn.org, ինչպէս նաեւ՝ էջեր սոցիալական ցանցերում, այդ թւում՝ Ֆէյսբուքում: «Մեզ կարող են միանալ բոլոր այն անհատները, ովքեր կիսում են մեր նպատակներն ու կը մասնակցեն դրանց իրականացմանը: Մեր ցանցը ստեղծում է իւրայատուկ միջավայր հայ պատանիների ու երիտասարդների համար՝ տրամադրելով նախադրեալներ նրանց առաջընթացի ու մասնագիտական զարգացման համար: Մեր անդամները մշտապէս բաց են խորհուրդներ տալու եւ աջակցելու», նշում է ցանցի համանախագահը, ով յաջողութեան հասած ամերիկահայ երիտասարդի փայլուն օրինակ է:
Շանթ Սահակեանը աշխատել սկսել է դեռ միջնակարգ դպրոցում սովորելու տարիներին: 14 տարեկանում նա հիմնում է իր սեփական ընկերութիւնը, որը զբաղւում է կայքերի ստեղծմամբ: «Սեդնա Սոլուշընզ»ը տարիների ընթացքում զարգանալով աւելացրել է առաջարկուող ծառայութիւնները եւ ներկայում կատարում է բրենդինգ, մարքետինգ, ինչպէս նաեւ, կայքերի հետ զուգահեռ պատրաստւում են ծրագրեր հեռախօսների համար: Շանթ Սահակեանի հիմնած ընկերութիւնը ներկայում ոլորտի լաւագոյններից է եւ համագործակցում է բազմաթիւ հեղինակաւոր կազմակերպութիւնների ու ընկերութիւնների հետ: «Սեդնա Սոլուշընզ»ի վերջին յաջողութիւններից է Գլենդելի համար պատրաստուած հեռախօսային ծրագիրը, որ արժանացել է «Ինթերնեթ Մարքեթինք Ասոսիէյշըն»ի գլխաւոր մրցանակին՝ «Ազդեցութիւն» անուանակարգում: «Գլենդել Դաունթաուն» ծրագիրը (Downtown Glendale app) մանրամասն տեղեկութիւններ է տրամադրում Գլենդելի կենտրոնում գործող ճաշասրահների, խանութ-սրահների, տարաբնոյթ ծառայութիւնների, կայանատեղիների, նաեւ՝ մշակութային կենտրոնների ու սպասուող միջոցառումների մասին: Գործում է նաեւ նորութիւնների բաժին: Այն կարելի է ներբեռնել անվճար», տեղեկացնում է Սահակեանը, ում պատրաստած ծրագիրը Գլենդելի զարգացմամբ զբաղուող կազմակերպութեան մրցոյթում ճանաչուել էր լաւագոյնը աւելի քան հարիւր մրցակիցների շարքում:
Քաղաքի զարգացման եւ մշակութային ոլորտում հայ համայնքի աշխուժացման գործում իր ներդրումը Շանթ Սահակեանն այսուհետ կը շարունակի նաեւ որպէս քաղաքապետարանի Մշակոյթի եւ արուեստի յանձնախմբի յանձնակատար: «Քաղխորհրդի անդամ Վարդան Կարապետեանն ինձ առաջադրեց այս պաշտօնին, եւ շնորհակալ եմ այս նշանակման համար: Իմ համար առաջնային է, որ այս յանձնախումբը շարունակի ակտիւ ներդրում ունենալ սերունդների մշակութային զարգացման գործում: Ես մանկուց մասնակցել եմ քաղաքապետարանի կողմից կազմակերպուած արուեստի տարբեր ծրագրերի, եւ դրանց շնորհիւ են նաեւ ձեւաւորուել իմ հմտութիւնները: Մեր մանուկներն ու պատանիները պէտք է ունենան բոլոր հնարաւորութիւններն արուեստի տարբեր ճիւղերում իրենց ընդունակութիւնները զարգացնելու համար»:
Շանթ Սահակեանը փորձելու է նաեւ քաղաքապետարանի Արուեստի եւ մշակոյթի յանձնախմբի տարբեր ծրագրերում հնարաւորինս ներգրաւել հայ արուեստագէտների: Յանձնախմբի ծրագրերին կարելի է ծանօթանալ՝ այցելելով Գլենդելի քաղաքապետարանի կայքի Արուեստի էջ: Միաժամանակ, յանձնախմբի ժողովները բաց են հանրութեան համար եւ տեղի են ունենում ամէն ամսուայ երրորդ Հինգշաբթին, քաղաքապետարանի ժողովասրահում: Այդ հաւաքների ժամանակ իւրաքանչիւր անհատ կամ կազմակերպութիւն կարող է հանդէս գալ առաջարկով, եւ բաժանմունքի ընդհանուր ծրագրերին համապատասխանելու դէպքում դրանց ընթացք է տրւում:
Շանթ Սահակեանը, չնայած իր յագեցած աշխատանքային օրակարգին եւ հասարակական հիմունքներով տարբեր կառոյցներում ներգրաւուածութեանը, մշտապէս ակտիւ մասնակիցն է Հայ Դատի աշխատանքների: Նրա մասնագիտական աջակցութեան յայտնի օրինակներից էր Ապրիլի 24ի ամենախոշոր միջոցառման՝ Արդարութեան քայլարշաւի կայքը, որ այդ ձեռնարկի կայացման կարեւոր գործիքներից էր: Հայկական հարցերի եւ համայնքի շահերի արծարծման առումով Շանթ Սահակեանի գործունէութեան հարթակներից է Դեմոկրատական կուսակցութիւնը, որտեղ 43րդ ընտրատարածքից նա այս տարի ընտրուեց պատուիրակ: Սա ենթադրում է, որ Սահակեանի ձայնը ներկուսակցական տարբեր ժողովներում եւ ընտրութիւններում այսուհետ որոշիչ նշանակութիւն կ՛ունենայ: Երիտասարդ գործիչը նաեւ Գլենդելի երիտասարդ արհեստավարժների միութեան ղեկավար խորհրդի անդամ է:
Հարցին, թէ ինչպէս է ժամանակ գտնում նաեւ առաւելագոյն ներգրաւուածութիւն ունենալ հայկական հարցերին ուղղուած աշխատանքներում՝ Շանթն անկեղծօրէն պատասխանեց. «Սրտիցս է բխում»: Բազմաթիւ յաջողութիւնների հասած եւ իր ազգային ինքնութեանը հաւատարիմ երիտասարդ գործիչը խոստովանեց, որ հայ համայնքն ու հայկականը առաջնահերթութիւն են. «Կարեւոր է, որ իւրաքանչիւրս մասնակցենք, որ փոփոխութիւն լինի: Ես ուրախ եմ, որ հնարաւորութիւնը ունեցայ տարբեր հայկական կազմակերպութիւնների միջոցով օգտակար լինել հայ համայնքին: Եթէ ցանկութիւն լինի, ամէն ինչ կարելի է հասցնել, եւ ամէն հայ երիտասարդ կարող է դառնալ այդ փոփոխութիւնը՝ ներգրաւուելով իր քոլեջի կամ համալսարանի հայկական ուսանողական միութիւնում, Հայ Դատի յանձնախմբում, Արհեստավարժների միութեան մէջ կամ այլ հայկական կազմակերպութիւնում: Սա տարբերութիւն արձանագրելու լաւագոյն միջոցներից է», համոզուած է Շանթ Սահակեանը: