(ԱԼԻՔ, 23 հոկտեմբերի 2016) Նախաձեռնութեամբ Նոր Ջուղայի Հայ կանանց Գթութեան միութեան եւ համագործակցութեամբ Նոր Ջուղայի Հայ Մ. Մ. «Արարատ» միութեան ու Հայ Դատի «Արձագանգ» քարոզչական յանձնախմբի, հինգշաբթի՝ սեպտեմբերի 29-ի երեկոյեան, «Արարատ» միութեան շրջափակում, տեղի ունեցաւ բարեգործական դաշտահանդէս, որի հասոյթն ամբողջութեամբ յատկացւելու է Արցախին եւ արցախահայութեանը զօրակցելու աշխատանքներին։
Միջոցառման ընթացքում «Արձագանգ» քարոզչական յանձնախմբի կազմակերպութեամբ իրականացւեց Արցախին անդրադարձող հետաքրքիր ծրագիր, որն սկիզբ առաւ 25-ամեայ Լեռնային Ղարաբաղի Հանրապետութեան օրհներգով։ Ապա Մանիա Ղուկասեանի միջոցով ընթերցւեցին նիւթեր, որոնցով լուսարձակի տակ առնւեցին Արցախի ազատագրական պայքարը, ապրիլեան քառօրեայ պատերազմը եւ թեմիս կատարած աշխատանքներն արցախահայութեանը զօրակցելու ուղղութեամբ։ Իւրաքանչիւր հատւածի ընթերցումից յետոյ ցուցադրւում էին նիւթին համապատասխան տեսանիւթեր։
Յատկանշական է, որ խանդավառ մթնոլորտն ապահովելու համար կազմակերպիչների միջոցով նախատեսւել էին՝ ուրախ երաժշտութիւն, ձեռքի աշխատանքի պատրաստման կրպակ՝ մանուկների համար, վիճակախաղ, անուշաբոյր ուտեստների եւ Արցախից բերւած հայկական աւանդական ուտելիքների ու յուշանւէրների վաճառք, ինչու չէ նաեւ բազմաթիւ այլ խաղեր, որոնցով երեկոն աւելի գրաւիչ ու հաճելի դարձաւ յատկապէս մանուկների ու պատանիների համար։
Թղթակից
(Նոր Ջուղա)