«ԱԼԻՔ», Կ. Դ. – «Թուրքիայի վերջին խորհրդարանական ընտրութիւնները եւ քաղաքական դաշտում կանխատեսւող փոփոխութիւնը» բնաբանով կայացաւ դասախօսական երեկոյ, Հայկական Հարցերի ուսումնասիրութեան կենտրոն՝ «ՀՈՒՍԿ»-ի կենտրոնատեղիում: «Թուրքիան՝ խորհրդարանական ընտրութիւններից յետոյ. արդիւնքների վերլուծութիւն, հնարաւոր հեռանկարներ» համապարփակ թեման ներկայացրեց Հայ Դատի յանձնախմբի փոխնախագահ, «Ալիք» օրաթերթի խմբագրակազմի անդամ Արամ Շահնազարեանը:
Դասախօսն իր ելոյթի ընթացքում համապարփակ բացատրութիւն փոխանցելով Թուրքիայի խորհրդարանական ընտրութիւնների մասին, կարեւորութեամբ անդրադարձաւ առաջիկայ ամիսներին կանխատեսւող հնարաւոր փոփոխութիւնների մասին, աւելացնելով, որ ըստ Թուրքիայի օրէնսդրութեան եւ սահմանադրութեան, 90 օրւայ ընթացքում յաղթող կուսակցութիւնը, կամ կուսակցութիւնների բլոկը, պէտք է ձեւաւորի նոր կառավարութիւնը, իսկ հակառակ դէպքում Թուրքիայում տեղի են ունենալու արտահերթ խորհրդարանական ընտրութիւններ: Նա ապա յետդարձ հայեացք նետեց 2000 թւականների սկզբնական օրերին, անդրադառնալով իշխող «Արդարութիւն եւ զարգացում» կուսակցութեան իշխանութեան անցնելու պրոցեսին, նշելով որ այն, այսինքն Էրդողանին ներկայացնող կուսակցութիւնը, մինչեւ վերջին խորհրդարանական ընտրութիւններջ՝ ունէր բացարձակ մեծամասնութիւն, որը, սակայն, տեղի տւեց վերջին ընտրութիւններում եւ իշխող կուսակցութիւնը թէեւ հաւաքեց շուրջ 41 տոկոս քւէ, սակայն դա բացարձակ մեծամասնութիւն չէր, որը նշանակում է ինչ որ հիմնական փոփոխութիւն՝ Թուրքիայի քաղաքական դաշտում: Դասախօսն ապա մանրամասն անդրադարձաւ տարբեր կուսակցութիւնների կողմից քւէների սանդղակում իրենց զբաղեցրած տոկոսներին եւ կարեւորութեամբ խօսեց քրդամէտ՝ «Ժողովրդա-դեմոկրատական» կուսակցութեան մասին:
Արամ Շահնազարեանը կարեւորութեամբ անդրադարձաւ նաեւ Թուրքիայի խորհրդարան մուտք գործած երեք հայ պատգամաւորներին, որոնք ներկայացնում են երեք տարբեր կուսակցութիւններ: Նա նշեց իւրաքանչիւրի քաղաքական դիրքորոշումները:
Դասախօսն եզրակացրեց, որ Թուրքիայի քաղաքական դաշտը յայտնւել է անցումային շրջանում, որը պարտադիր՝ բերելու է որոշակի արմատական փոփոխութիւնների: Սակայն դա չի նշանակում, որ տեսանելի ապագայում նախագահ Էրդողանն ու նրա գլխաւորած կուսակցութիւնը կը կորցնեն իշխանութիւնը:
Վերջում հնչեցին հարցեր, որոնք մեծամասամբ առնչւում էին Թուրքիայի խորհրդարանում եւ կառավարութեան մօտ Հայոց Ցեղասպանութեան եւ Հայկական Հարցի դրսեւորման հաւանականութեանը, որոնց սպառիչ պատասխաններ տւեց դասախօսը:
