«ԱԼԻՔ» – Նախաձեռնութեամբ Հայկական հարցերի ուսումնասիրութեան Կենտրոն՝ «ՀՈՒՍԿ» հաստատութեան, երէկ դեկտեմբերի 6-ի երեկոյեան, նոյն միութեան կենտրոնատեղիում կազմակերպւել էր դասախօսական երեկոյ:
Դասախօս էր հրաւիրւած պոլսահայ մտաւորական, թուրքագէտ Տիրան Լոքմագեօզեանը, իսկ թեման էր՝ «Քաղաքական իրադարձութիւնները՝ Թուրքիայում»: Դասախօսութեան սկզբում դասախօսի մասին ամփոփ տեղեկութիւններ փոխանցեց Թեհրանի Հայ Դատի յանձնախմբի նախագահ Արամ Շահնազարեանը:
Դասախօսը համապարփակ եւ իրատես գծերով ներկայացրեց տարածաշրջանային վերջին իրադարձութիւններում՝ յատկապէս Սիրիայի հարցով Թուրքիայի դերակատարութիւնը, թուրք-ռուսական միջադէպերը եւ ներկայ իրավիճակը: Թուրքիայի ու Սիրիայի միջեւ ընթացող խնդիրները քննարկելու նպատակով, նա յետադարձ հայեացք նետեց երկու երկրների յարաբերութիւնների պատմական անցեալին՝ Հաֆէզ Ասադի ժամանակներից մինչեւ, Բաշշար Ասադի օրերը: Տարածաշրջանային հիմնահարցերը վերլուծելիս, դասախօսը անդրադարձաւ նաեւ Թուրքիայի ժամանակի արտգործնախարար, իսկ այսօր արդէն վարչապետ Դաւութօղլուի հեղինակած դոկտրինային՝ «զրօ պրոբլեմ հարեւանների հետ» եւ նշեց, որ այն այսօր կատարելապէս ձախողել է եւ Թուրքիան իր հարեւանների հետ ունի միայն պրոբլեմներ: Նա խօսեց նաեւ ԴԱԷՇ-ի եւ Թուրքիայի յարաբերութիւնների, Փարիզի վերջին դէպքերի եւ Եւրոպայում թուրքերի դերակատարութեան ու ազդեցութեան մասին: Անդրադառնալով հայութեան եւ Հայկական Հարցի նկատմամբ Թուրքիայում նկատւող փոփոխութիւններին, Տիրան Լոքմեգեօզեանը նշեց, որ դրանք դեռեւս աննշան են, եւ տոկոսային առումով թուրք հասարակութեան մօտ շատ քիչ է նրանց թիւը, ովքեր ցանկանում են առերեսւել իրականութեան հետ:
Նա կարեւորեց նաեւ այն հանգամանքը, որ թուրք ժողովրդին հայ իրականութեանը ծանօթացնելու նպատակով անհրաժեշտ է փաստագրական գրքերի թարգմանութիւնը թուրքերէնով եւ դրանք թուրք ժողովրդին հանրամատչելի դարձնելը:
Մէկժամեայ դասախօսութեան աւարտին ներկաներին հարցումների առիթ տրւեց:
Լուսանկար – Տիրան Լոքմագեօզեան